سامحيني .. واذكريني قدّ ما انتي تقدرين ..

جميلة . .
من ابداع فهد المساعد . . متنفس الشعر . .
قديمة . . ولكن احببت ان انقل لكم ابداعها . .
وارجوا ان تنال اعجابكم . .

\\
قبل اسافر كنت جالس في زمان الأنتظار
ارتشف هم المكان وكل همي .. حاجتين

,

كنت خايف من يباس وكنت خايف من خضار
كنت اخاف انك تجين .. وكنت خايف ماتجين

,

لين شفتك من ورى بيبان صالات .. المطار
مقبله من كثر شوقك كنت اشوفك تركضين ..

,

مرة ٍ ركضك يمين .. ونظرة عيونك يسار
ومرة ٍ ركضك يسار .. ونظرة عيونك يمين

,

تايهه ماكنك الا ضحكة ٍ .. وسط انكسار
ساكته ماكنك الا دمعة ٍ .. فيها حنين ..

,

خايفه وجله حزينه .. يعني كنتي بإختصار
تشرحين لكل عاشق معنى كلمة .. عاشقين

,

بعدها جيتك .. ولدّت عينك .. ودار الحوار
من كفوفي دمعتين .. ومن كفوفك دمعتين

,

كنت اصد .. وكنتي انتي ثايره .. مثل الشرار
ماعلى لثغة لسانك غير كلمة ( وين .. وين ؟ )

,

واذكر اني رحت قبل ابديلك .. ايّة اعتذار
رحت حتى قبل اطيّب خاطرك في كلمتين ..

,

لكن انتي عارفتني زين .. واللي صار صار
سامحيني .. واذكريني قدّ ماانتي تقدرين ..

,

اذكريني لاانتهت .. للشمس رحله مع نهار
واذكريني لاصحى .. للصبح ورد الياسمين

,

واذكريني لالمحتي في .. ليالي البرد نار
واذكريني لاسمعتي للمطر صوت ٍ حزين ..

,

اذكريني واذكريني واذكريني .. بإختصار ..
اذكري .. فهد المساعد .. قدّ ماانتي تقدرين . .

\\
لكم ودي